A igrexa, dunha nave e arcos faixóns, presenta ao exterior grande serenidade de liñas. Aos pés abre a porta de accesos, arquitrabada, e sobre ela óculo cuadrilobulado. A cornixa presenta as ramplas curvas, con pináculos asentados nos extremos. No centro érguese a espadaña dun corpo de arcos, coroada por frontón de notable desenvolvemento.
No interior, o retablo maior ofrece na base a seguinte inscrición: " Esta obra a pinto sendo Prior o Señor Don Martin Gordan Año de 1739. Píntome Dn Josef Rz de Ourense". Na rúa central presiden Santiago peregrino e o Crucificado.