É un dos santuarios máis destacados da comarca e ao que acoden numerosos devotos de ambos lados da ría de Arousa cada luns seguinte á Pascua do Pentecostes. A capela, de gran pureza de liñas, é de planta rectangular con unha única división na cabeceira que a separa da sancristía. Os muros son de perpiaño de granito e nos que as pezas maiores se localizan nos esquinais, xambas e linteis. No interior ten unha cuberta plana que oculta as cimbras de madeira que sosteñen a cuberta a dúas augas. Aos pés levántase a tribuna á que se accede por unha escaleira en "L" encastada ao muro norte no que se abre unha segunda porta de acceso. No muro sur, á altura do presbiterio, existe un corpo encastado de planta cadrada que serve como outra porta lateral.
A fachada é de gran sinxeleza. Componse por unha porta rectangular sobre a que se abre un pequeno van circular, rematado por un frontón triangular formado polas cornixas a dúas augas unidas por outra cornixa na súa base. O conxunto coroase no vértice con unha espadana sobre peaña horizontal con dous ocos rematados en arcos de medio punto sobre os que se remata con unha cornixa con pináculos e moldura curva.