Capela que foi trasladada en 1982 do seu lugar orixinal na parroquial de Seoane, debido á explotación mineira de lignito de Endesa, sendo reconstruída no lugar actual, xusto en fronte do cemiterio parroquial de Goente. De planta rectangular de única nave e un presbiterio, os seus muros son de bloque pintados de branco e combinados cos mellores perpiaños graníticos da vella capela, que aparecen á vista nos reforzos de esquinais e vans. Cuberta de lousa a dúas augas. Fachada principal con porta rectangular da que destaca o lintel superior con varios motivos e debuxos circulares, con óculo central e espadana superior. Interior: arco triunfal de medio punto, retablo barroco con talles de San Roque e Santo Antonio de Padua do XVIII, e pavimento de lastras. Interesante cruceiro con dous petos de esmolas nas proximidades.