Igrexa fabricada en cachotería luosenta, cos reforzos graníticos de vans e esquinais, e cuberta de lousa a dúas augas. De planta rectangular, con engadidos nos seus muros meridional e setentrional. Fachada principal articulada en tres corpos, con maior protagonismo do central, no que se abre unha porta alintelada, un oco semicircular e unha espadana de dobre van que remata nun pequeno corpo ornamental flanqueado por pináculos. Destaca tamén o sinxelo pórtico situado na fachada e que continúa polo muro meridional ata unha segunda porta de acceso á nave. Interior: arco triunfal de medio punto, coro alto aos pés, e retablo maior e laterais de estilo neoclásico de grande valor artístico, con diversos talles.