Propiedade privada.
Edificio do segundo terzo do século XIX (1869-1876), con certo aire romántico. Presenta unha planta cadrada disposta en tres alturas máis baixocuberta. O interior esta condicionado polo núcleo da escaleira, elemento articulador da vivenda, que se traduce ao exterior nunha torre-miradoiro.

As súas fachadas están compostas de modo clásico. No piso baixo atópanse a porta de entrada e ventás de pequeno tamaño. No primeiro piso as ventás divídense verticalmente e péchanse cun pequeno balcón de ferro, mentres que un balcón sobresae por enriba da entrada apoiado sobre tres canzorros. No último piso unha galería percorre toda a fachada, combinando cristal e madeira pintada de verde. A fachada posterior caracterízase por unha sucesión de vans colocados simetricamente.