A desaparición do antigo pazo dos Andrade, deixa libre un gran espazo público dispoñible. Xa dende os anos vinte estaba na mente dos rexedores de Pontedeume a idea de construír un mercado municipal, precisamente en devandito espazo na que xa se viñan celebrando feiras de gando vacún e porcino os domingos. En 1935, o proxecto de urbanización da praza xa contemplaba a construción deste mercado, pero a  Guerra Civil fixo que se pospuxese até 1951. As obras adxudicáronse ao arquitecto Antonio Tenreiro en 1952, ano no que comezaron as obras. Non se sabe a data de remate pero sí que en 1960, xa estaba ordenado en dezanove postos. A parte sur foi ampliada en 1984. 

O edificio do mercado destaca pola súa estrutura aberta e porticada, a modo de soportal que relaciona o interior co seu entorno. Na entrada norte sobresae un grande arco circular, de remate mixtilíneo, que o relaciona coa arquitectura neocolonial.