Edificio con restos da estrutura románica, a pesar de que foi reedificado no século XIX. Ten planta de cruz latina con nave rectangular dividida en dous tramos, brazos rectangulares de pequenas dimensións, presbiterio cadrado e sancristía apegada a este no lado esquerdo, con acceso dende o exterior e dende o presbiterio. Os muros son de cachotería e cantería de granito e a cuberta é de tella a dúas augas. Conserva ventá seteira. Na nave dispón dunha portada alintelada, ademais de varios canzorros pertencentes á obra románica. O frontis ten portada alintelada e culmínase cunha espadana de dous corpos e balaústre de pedra na parte de atrás, á que se accede dende unha escaleira exterior que se asenta sobre o muro dereito da nave. Destacan no seu interior os dous retablos laterais, de estilo neoclásico.