Igrexa situada no barrio da Vila do Medio de Burela. Destacan as súas pinturas de finais do século XV-principios do XVI, de autor descoñecido e factura arcaico medieval, encadradas dentro do estilo gótico tardío. Representan escenas da Paixón de Xesucristo e actualmente consérvanse en bo estado dúas delas: “A flaxelación” e “A sepultura de Xesús”.

No ano 1962 esta igrexa deixou de ter culto e foi abandonada. No ano 1973 as súas pinturas foron descubertas debaixo de capas de cal e deu comezo a súa restauración. Tamén é de resaltar a reprodución idéntica da Virxe do Pilar doada pola Catedral Basílica da Nosa Señora do Pilar de Zaragoza.