Construída a mediados do s.XII, conserva integramente a obra medieval. Ten planta dunha soa nave da que sobresae unha ábsida rectangular. A fachada principal está flanqueada por dous contrafortes que enmarcan unha portada con catro columnas encostadas que se prolongan en arquivoltas lixeiramente decoradas. O tímpano decorase con cruces entrelazadas. Por riba del un óculo e espadana. Destacan os canzorros dos muros laterais. Na ábsida atopamos unha fiestra con pequenas columnas encostadas, arco e arquivoltas que se adornan con motivos xeométricos. A cuberta da ábsida é de bóveda de canón apuntada sustentada sobre uns muros reforzados por columnas encostadas e contrafortes. Os capiteis adórnanse con motivos vexetais e xacobeos. Os retablos interiores datan do s. XVIII.