En realidade son dúas moles graníticas, A Curotiña (368 m) e maila Curota (498 m). Non son os máis altos nin os únicos miradoiros da Serra do Barbanza co punto máis elevado no monte Iroite (685 m), pero si dos mellores para ter unha perspectiva case aérea das Rías Baixas; e, en días claros, disque ata Portugal. Nestas ocasións convértense no mellor punto para comprendermos a tranquilidade das rías mentres ós nosos pés barcos e bateas semellan figuras dunha enorme maqueta.
A pouca distancia do mar e o forte desnivel orixina abruptos descensos dos ríos. Dende A Pobra do Caramiñal dáse chegado a modo ás fervenzas do río das Pedras. Dende Boiro, ás de Cubelos. Nos meses de verán as súas frías augas recompensan a fatiga do ascenso, sempre con xeito.
Polos catro costados habemos bater con restos megalíticos. Dolmens como a Arca do Barbanza ou a Casota do Páramo (Boiro) e Axeitos (Ribeira); castros como o de Baroña (Porto do Son) ou os do Neixón (Boiro). Valores paisaxísticos de primeira orde. Nas chairas elevadas da serra do Barbanza aséntanse brañas e terreos de turbeira, ecosistemas de gran riqueza.