A maior parte do percorrido localízase dentro do Espazo Natural «Complexo Ons-O Grove» dentro da Rede Natura 2000. Iniciamos o camiño bordeando a costa e contemplando fermosos areais de augas cristalinas e area fina. É parada obrigatoria visitar a antiga fábrica de salga coñecida como Salgadeira de Barcela.

Tras deixar a costa, a paisaxe adquire os caracteres habituais da Galicia rural, onde pasteiros e zonas agrícolas nos acompañan deica a fin do camiño nas Rodeiras.

Esta ruta toma o seu nome dos restos arqueolóxicos da necrópole coñecida como Adro Vello, situada á beira do mar, onda a Praia do Carreiro, e que ao longo da historia albergou unha vila romana e PR-G 115 Ruta do Adro Vello unha fábrica de salga, así coma outros asentamentos de antigos poboadores. Os traballos de escavación realizados nos últimos anos puxeron ao descuberto sepulturas, así como muros de traza romana, pavimentos e os cimentos da primitiva igrexa visigótica, que no s. XVIII, por mor dos frecuentes saqueos de piratas e dos golpes de mar, se trasladou a un lugar máis seguro, que é o que ocupa actualmente o templo de San Vicente.

Hoxe en día este xacemento encóntrase valado e pechado totalmente ao público.