Esta ruta, practicamente circular, parte dende as proximidades do colexio público de Rubiá e ascende cara ao monte dos Chancelos co obxectivo de coroar o Alto de Cales e descender novamente cara a Rubiá.
A través dun antigo camiño de carros, vaise collendo altura mentres se goza dunhas espectaculares vistas das paisaxes do val de Valdeorras. Este percorrido caracterízase pola existencia de barrancos ou cavorcos, que responden a nomes como Paradela, Valdaoliva, Nacedeiro, ou dos Castros.
Tras alcanzar o punto máis alto da ruta iníciase un descenso a través dun bosque de ribeira, froito dos numerosos regatos que baixan dende as montañas cara a Rubiá e que cruzaremos a través de varios pasos de madeira ata alcanzar o final da ruta.
Dende este lugar, seguindo en dirección á canteira durante uns 650 metros, pódese retornar ao punto de saída.