A creación deste museo monográfico vese xustificada pola importancia do Castro de Viladonga, pola cantidade e calidade dos restos arqueolóxicos e pola necesidade de expoñelos no seu propio contexto. Situado ó pé da muralla dun asentamento castrexo e galaico-romano tardío, mostra numerosos obxectos da vida cotiá deste poboado de hai máis de vinte séculos. Os seus fondos proceden das escavacións arqueolóxicas realizadas no depósito arqueolóxico, de onde se sacaron á luz moitas pezas (ferramentas, xogos, apeiros de labranza, cerámica, obxectos de adorno, etc.). As maquetas son parte fundamental da didáctica do museo que o converten nunha visita ineludible que complementa o percorrido polo Castro de Viladonga.