O actual edificio aberto ao público sitúase na Praza das Praterías, no espazo do antigo Banco de España, inmoble proxectado polo arquitecto Romualdo de Madariaga e inaugurado en 1949. Aquel edificio foi remodelado por Manuel Gallego Jorreto, entre 2009 e 2012, para adaptalo ás necesidades museísticas, e o Museo das Peregrinacións e de Santiago instalouse alí en novembro de 2015 trasladando as súas obras mestras desde a Casa Gótica -antiga sede expositiva e na actualidade sede administrativa-.

A actual exposición permanente, distribuída en tres plantas, céntrase nas seguintes áreas: a peregrinación como fenómeno universal, o Camiño de Santiago e a peregrinación Xacobea e, por último, a cidade de Santiago. En relación con este discurso expóñense esculturas, pintura, gravados, libros, documentos, etc., que explican as peregrinacións en sentido amplo.

Así mesmo, o museo realiza varias exposicións temporais ao longo do ano.