Esta igrexa do século XVIII ten muros de cadeirado en granito e a cuberta en tella a dúas e catro augas. É de planta de cruz latina, dunha soa nave, dividida en catro tramos por tres arcos faixóns de medio punto apoiados sobre pilastras que sosteñen unha bóveda de canón. As dúas capelas laterais son de planta rectangular e desiguais. O presbiterio está sostido por arcos de medio punto e con bóveda de cruzaría. A sancristía está apegada a un lateral. A fachada ten portada rectangular moldurada, e sobre esta ábrense unha fornela e un van rectangular. Nun dos seus laterais está a torre-campanario, de planta cadrada e dividido en dous corpos: a base e o campanario propiamente dito. Ten un terceiro corpo composto por unha cúpula sobre tambor. A decoración é de inspiración barroca.

No interior alberga un retablo e imaxes dos escultores Felipe de Castro e José Ferreiro.