Igrexa con nave de planta rectangular, ábsida cadrada e sancristía pegada ao alzado esquerdo do presbiterio. Os muros que a conforman son de cachotaría e cantería de granito, e a cuberta de tella a dúas augas. A portada está rematada nunha espadana de dous vans.

Conserva no altar maior un retablo de estilo Neoclásico.

No lugar do Castro érguese un cruceiro e os restos do cemiterio. Segundo conta a lenda aquí era onde se situaba a primitiva igrexa románica da que non quedan restos. Mantense na memoria colectiva o costume ancestral de ir lavar a cara ao amencer de san Xoán coa auga recollida nun sarcófago.