Igrexa románica cuxa fábrica orixinal data do século XII, aínda que sufriu importantes reformas posteriores, como o engadido da sancristía, que rompe a harmonía da edificación orixinal. 

Os muros son de cachotería e cantería de granito, e a cuberta, de tella a dúas augas. A porta principal é alintelada tras a reforma que deixou o tímpano encaixado sobre mochetas. A ventá da ábsida perdeu as columnas e elevouse.  

 O arco triunfal componse de dúas arquivoltas, das cales a interior é de aresta viva. O muro descarga en columnas con plinto, bases tóricas e capiteis con motivos vexetais e figurados. Conserva no beirado canzorros de decoración variada. No testeiro o retablo maior oculta unha ventá tapiada, quedando á vista unha arquivolta con decoración de axadrezado.

O frontis remata nunha espadana dun só van.  A lacena-sagrario tallada no muro sur da ábsida é de feitura contemporánea á igrexa.