Pertence á Casa Grande da Costa, aínda que está situada no lado exterior do muro de peche da casa. A capela, de boas dimensións, é de planta rectangular. A fachada está coroada cunha espadaña dunha sóa campá. Na parte posterior da capela pódese ver unha cruz románica de pedra. No interior, fronte á porta, atopamos unha escultura do s XV que posiblemente pertenceu a unha tumba xa que a súa parte posterior está pouco traballada. Representa un guerreiro vestido con cota, as mans enguantadas que aferran unha espada e un puñal envainado na cintura. Próximo a este hai outra figura antropomórfica labrada en pedra, de menores dimensións.