Grupo de sete casas promovidas por Benito Sanjurjo Ramírez de Arellano entre os anos 1903-1912 e proxectadas por Michel Pacewicz e Jenaro de la Fuente Domínguez. As casas construíronse de dúas en dúas e as primeiras foron os números 21 e 23. Estas teñen unha planta baixa e tres pisos altos, son as máis sinxelas e foron proxectadas por Pacewicz. As demais incorporan elementos arquitectónicos máis complexos e riqueza ornamental e proxectounas Jenaro de la Fuente Domínguez. Todas teñen un forte almofadado nas súas plantas baixas e motivos ornamentais neobarrocos como frontóns curvos, óculos, vasos, etc.