Esta rota, que discorre preto do Camiño de Santiago, cruza zonas cunha importante mostra de bosque autóctono xunto a ribeira do río Loio. Podemos atopar pontes e muíños tradicionais dentro da rota, como o muíño e ponte da Retorta, ou seguindo unhas pequenas derivacións, como o agochado muíño de Pías.

A senda esténdese por bosques e montes que antano foron cultivados, polo que constantemente veremos restos de camiños de carros e de muros dos lindes das fincas. Soutos e carballeiras mistúranse cos bidueiros e ameneiros para protexer o río no profundo val.

En Loio unha derivación achégase ata as ruínas do mosteiro de Santa María de Loio, case esquecido na fondura do bosque. Dende Loio, a rota segue unha pista asfaltada ata a ponte da Ribeira do Loio, xunto o encoro de Belesar, onde finaliza o percorrido.