Elevado, cunha sobranceira forma e visible dende grande parte da comarca, o monte da Peneda é un dos lugares máis característicos da contorna da ría de Vigo.

A capela da nosa señora das Neves ou da Virxe da Peneda, datada no século XVII, preside o alto deste curuto de 329 metros e moi fortes pendentes. A edificación ocupa o lugar do castro da Peneda, asentamento que aproveitaba a fácil defensa estratéxica e a amplitude de vistas.

Dende o miradoiro, a carón da súa vella sobreira, divísase a ría de Vigo, dende a súa formación na desembocadura do río Verdugo ata a ponte de Rande, coas illas Cíes ao fondo.