Esta capela de pequenas dimensións sitúase a carón do recinto do Pazo dos Torrado de Brión, do que formaba parte. Foi fundada por Diego Manuel Torrado no ano 1873, cando a súa coxeira lle impedía acudir á igrexa parroquial. A planta é rectangular con dúas entradas, unha delas dende o recinto do devandito pazo. Anos despois engadiríaselle nun lateral a sancristía. Os muros son de cachotería, agás a fachada principal, feita de cantería. O interior está cuberto cunha bóveda de canón rebaixada. Contén un pequeno coro de madeira ao que antigamente se accedía por unha escaleira exterior de pedra e na actualidade por unha escada interior de madeira. A cuberta é a dúas augas e na fachada principal atópase o escudo da familia dos Torrado.