Esta senda percorre o tramo final do río Soldón, desde a antiga ferrería de Rugando, hoxe convertida en establecemento de turismo rural, ata a aldea de O Soldón, xunto ao río Sil. Dado que transcorre polo fondo do val fluvial, recoméndase facela en sentido descendente.

Dise que os veciños baixaban por este camiño o mineral das montañas de O Courel cara ás ferrerías que se atopan na zona. Ao partir da Ferrería de Rugando descéndese pola marxe esquerda do leito do Soldón e pronto se ve, alén do río, a aldea de Paradapiñol.

O roteiro atravesa algúns arroios como o Regueiro do Barreiro e o Regueiro de Rocaboa. Máis abaixo, cruza o río Soldón no lugar de Louredo, cambiando á ribeira dereita pola cal se debe seguir ata o final do carreiro. O camiño achégase a uns antigos colmeares e a uns muíños, hoxe xa abandonados.

O descenso, ás veces pronunciado, levaranos a O Soldón, onde finaliza o carreiro, preto da área recreativa que se atopa baixo o viaduto.