Esta pequena ruta discorre polo monte Castrove que, situado entre os concellos de Meis e Poio, é tamén o lugar no que se sitúan dous importantes mosteiros medievais: o mosteiro beneditino de San Xoán de Poio e o mosteiro cistercense de Santa María de Armenteira. 

Partindo das inmediacións de Pereiro de Abaixo collemos un camiño que se interna no bosque e que nos levará en primeiro lugar ao regato de Fentoso, onde cruzaremos unha ponte de madeira recentemente acondicionada para continuar remontando o río pola marxe esquerda. Cruzaremos aínda un par de pontellas máis antes de alcanzar o máis destacado desta ruta, a fervenza da Freixa Alta, que cun salto de aproximadamente 10 m pon final a este paseo.