O inicio deste paseo sitúase na parroquia de San Pedro de Sárdoma , concretamente xunto á ponte medieval. Trátase dunha construción, en uso dende o século XII, formada por dous arcos de medio punto e que conta, no medio deles, cun tallamar triangular que axuda a repartir a forza da corrente da auga.
Sobre ela cruzamos o río Lagares para continuar por unha senda que, a pesar de discorrer preto dalgúns edificios, debido a que estamos no centro da cidade, non perdeu o seu carácter rural. Despois de camiñar algo máis de 2 km chegaremos ao parque de Castrelos, o máis grande de toda a cidade e lugar ideal para practicar deporte ou pasar o día cos máis pequenos no seu parque infantil.
Aquí situamos o punto final deste paseo, non sen antes recomendar a visita ao pazo de Castrelos que, situado na parte alta do parque, alberga o Museo Municipal de Vigo. Recibe tamén o nome de Museo Quiñones de León porque foi precisamente D. Fernando Quiñones de León, marqués de Alcedo, quen o doou á cidade en 1924 e dispuxo que se adicase a museo. Xunto ao edificio, formando un conxunto indisociable, dispoñense os xardíns, onde poderemos gozar de gran cantidade de especies de plantas exóticas e ornamentais, algunas delas centenarias, e de varios exemplares de árbores incluídas no Catálogo de Árbores Senlleiras de Galicia.