O río Cerves nace na serra do Faro de Avión, próximo ao punto máis alto da provincia de Pontevedra. Pouco despois do seu nacemento o río encaixase nunha garganta e salva un sorprendente desnivel descendendo  dende Tourón, a uns 1000 m de altitude, ata o núcleo central de Melón, que se atopa a uns 450 m. 

Para acercarnos ás fervenzas debemos coller a estrada que vai de Melón a Tourón e ir atentos para ver a sinalización que nos desviará cara aos saltos de auga. Despois da ponte habilitada para ver as fervenzas, podemos subir por unha escaleira que atopamos á man dereita. Unha vez arriba, o camiño xira 180º permitíndonos ver a fervenza e o río dende a outra beira.