Construída na segunda metade do s. XVI. Ten unha nave de planta rectangular, muros de cachotaría e cadeirado recebados, cuberta a dúas augas e tellado de tella. A fachada ten unha portada a xeito de arco de triunfo. A porta principal alintelada está flanqueada por dous pares de columnas sobre plintos. Nos intercolumnios aparecen as figuras pétreas de Adán e Eva, aludindo ao pecado e á humanidade, San Gabriel e a Virxe María. O conxunto está coroado pola figura sedente de San Pedro. No lateral meridional hai unha imaxe de San Pablo en altorrelieve. Sancristía pegada a un dos laterais da nave. Espadana engadida no s. XVIII. Esta igrexa foi construída por encarga do señor das Torres do Allo, Don Gómez de Rioboo Villardefrancos.