Edificio de planta rectangular de catro alturas. O acceso á planta baixa e superior realízase pola fachada principal a través dunha escaleira exterior de dobre tramo con balaustrada de cantería moldurada e coroada por bólas. Ten tamén unha entrada máis sinxela na fachada posterior. Cuberta a dúas augas con tella curva, sufriu unha reforma coa colocación dun lucernario para mellorar a luminosidade do interior. Dende o punto de vista ornamental destaca, na liña de cornixa, un escudo sobre un friso ovalado.