Este itinerario forma parte dunha nova rede de sendeiros de pequeno percorrido no Parque Natural Baixa Limia-Serra do Xurés.

Pártese por unha pista desde a aldea de Queguas, pertencente á parroquia e arciprestado de S. Tomé de Venceáns. É esta unha ruta circular que bordea altas cotas de montaña polas Serras do Laboreiro e Queguas, alturas que roldan os 1.000 m onde domina a rocha e a matogueira. Atravesa lugares cun grande atractivo paisaxístico e alcánzanse visualmente horizontes que chegan ata os Montes do Quinxo ou os cumes graníticos e afiados da Serra do Xurés e os seus impoñentes bloques de pedra. Na zona son frecuentes os vestixios prehistóricos.