É unha das máis antigas da cidade. Neste lugar, conta a lenda, parece que se atopaba o eremita Paio orando, cando viu as luces que lle indicaron a situación dos restos do Apóstolo Santiago. A igrexa primitiva foi destruída por Almanzor no ano 997, e posteriormente levantada por Xelmírez. O edificio actual é un compendio de reconstrucións e engadidos realizados ao longo de case oito séculos: conserva, na portada románica, un relevo da Epifanía do s. XIV, época á que tamén pertence o pórtico; durante o S. XVII engádenselle algunhas capelas; e no S. XVIII decídese ampliar a igrexa, engadíndoselle dúas naves e construíndo o campanario. Por todo iso, hoxe pouco queda do edificio románico levantado por Xelmírez.