Ao norte do municipio da Fonsagrada atópanse dous dos sendeiros máis interesantes de Galicia: o PR-G 139 e o PR-G 140, conectados entre si e que destacan pola calidade dunhas sendas abertas exclusivamente para chegar a lugares inaccesibles da Reserva da Biosfera Río Eo, Oscos e Terras de Burón.

O PR-G 139 discorre por camiños e antigas corredoiras que supoñen un retorno ao pasado, cheo de testemuñas etnográficas e culturais: muíños, corripas (construcións circulares para o almacenamento de castañas), serrarías de madeira... etc.

O inicio atópase na aldea Vilardíaz, punto máis elevado do recorrido, dende aquí a ruta descende en dirección noroeste cara ao val do río Logares, afundido na espesura do bosque caducifolio. Entre a gran diversidade natural sobresaen os magníficos exemplares de teixo ao longo do camiño de San Martín de Robledo. Os dous únicos edificios desta aldea, a igrexa e a casa reitoral brasonada, chamarán a atención do camiñante.

Na aldea de Romeán, á que chegaremos seguindo a derivación e erixida ao pé do castro do mesmo nome, poderemos ver un hórreo característico desta zona. A senda continúa paralela ao río percorrendo os meandros onde se forman fermosos saltos de auga. O atrevido deseño do trazado ofrécenos fabulosas perspectivas do río a diferentes alturas, todas elas acondicionadas para dar seguridade ao camiñante. Afastarémonos do río para comezar o ascenso de regreso cara a Vilardíaz,  zigzaguearemos pola montaña e teremos fabulosas perspectivas do val do río Veiga.