A senda é lineal e discorre desde A Ponte ata o Sestil Alto. O camiño comeza na praza da igrexa de Santa María Madalena. Non hai que abandonar A Ponte sen visitar o Centro de Visitantes da ZEC Pena Trevinca nin a Casa dos Vaqueiros, con tallas de orixe prerromano na pedra dos seus muros exteriores.

Tras cruzar o Pontón de Pena Pausa, a senda continúa por un camiño entre muros, en dirección ao Pontón das Olgas. Antes de chegar, o itinerario ascende cara ao val do río Meladas onde compartirá brevemente o seu trazado co PR-G 198.1. Ao separase desta variante e, tras cruzar unha pasarela de madeira sobre o río Meladas, comeza o ascenso polo lombo do Sestil Alto. Desde arriba pódese gozar de magníficas vistas sobre o val de orixe glaciar do río Xares.

O carreiro remata entre o cume do Sestil Alto e A Valigota onde conecta co PR-G 198. Desde alí, accédese ao cume de Pena Trevinca en apenas 1,8 km. O regreso pódese realizar polo mesmo roteiro ou por calquera dos carreiros conectados.