Desde a área fluvial e recreativa de Lodeiro, xunto ao río Lérez e a desembocadura do seu afluente Rego de Maneses, a senda remonta este último durante uns catro quilómetros ata o Muíño de Chan do Coiñal, para logo pasar xunto ao Parque Arqueolóxico da Arte Rupestre de Campo Lameiro e, finalmente, regresar ata a beira dereita do Lérez.

O itinerario transcorre polo val do río Maneses, xunto ao seu leito e cruzando dunha ribeira a outra constantemente. Permite observar os numerosos muíños fariñeiros movidos polas augas deste arroio, así como as distintas construcións que os rodean: pontes, pasarelas de pedra, canles, pequenas presas, etc.

Fóra do río, na parte máis alta do roteiro, coincidiremos coa entrada do Parque Arqueolóxico. É unha visita digna de programar e realizar con tempo. Logo, o carreiro descende e atravesa pequenas poboacións ata chegar xunto ao leito do Lérez, continuando un quilómetro ata chegar a Lodeiro.