A máis solemne manifestación de relixiosidade en torno á Paixón de Cristo que ten lugar na provincia de Pontevedra son as procesións de Semana Santa de Cangas, que contan con pasos de gran valor histórico-artístico e imaxes articuladas, como a do Nazareno da procesión do Santo Encontro ou o Cristo da cerimonia do Descendemento, que lles dan aos actos un emotivo realismo.

As celebracións relixiosas comezan xa o Venres de Paixón, coa festividade de Santísima Virxe das Dores (festa local). Moi vistosa é a procesión do Xoves Santo, co Paso da Mesa, que representa a última cea, con produtos naturais, o da Oración no Horto das Oliveiras e o da Flaxelación, un fermoso conxunto artístico ao que segue baixo palio, pechando a procesión, a Virxe das Dores.
O Venres Santo sae pola mañá a procesión da Negación de San Pedro, notable pola afluencia de xente nova, que leva a imaxe de San Pedro ao redor dos Xardíns de J. Félix Soage Villarino, e participa ao final dunha gran chocolatada. A mediodía, o centro da localidade énchese de xente que acode á procesión do Santo Encontro. A medida que se vai relatando a pasaxe histórica da subida ao monte Calvario, van aparecendo as imaxes dos protagonistas dela: San Xoán, A Verónica, María Magdalena, María Cleofás, María Salomé e a Virxe das Dores. O Nazareno, acompañado do Cirineo e de soldados romanos, cae tres veces grazas a un sistema de articulación.
Música de gaitas e redobres de tambores acompañan o paso lento dos costaleiros, dos penitentes e dos confrades, estes cos seus tradicionais estandartes, túnicas e caparuchos, en procesións nas que non faltan os centurións romanos, perfectamente ataviados. As procesións (ata catro teñen lugar o Venres Santo) destilan solemnidade e recollemento e son contempladas con contida emoción por numeroso público amontoado nas beirarrúast.

Para non perderse:
Procesión do Santo Encontro, co paso das Caídas do Nazareno, coa figura de Xesús articulada