Turismo de Galicia

A Xunta de Galicia está a avanzar nos preparativos do Xacobeo 2027, un evento no que o Goberno galego traballa para acadar a máxima participación empresarial e social.

Inclúe medidas como o novo Plan Director de Patrocinios do Xacobeo 2027, a medida coa que o Goberno autonómico vai ordenar e estruturar os criterios e procedementos que vén aplicando na xestión dos eventos patrocinados con fondos públicos vencellados ao Xacobeo 2027. 

Esta ferramenta crea un marco específico para os patrocinios garantindo que a programación se desenvolva con criterios homoxéneos e seguridade xurídica, impulse a colaboración público-privada e non invada nin substitúa as liñas de programación xa existentes e ordinarias que desenvolven os departamentos competentes en materia cultural, turística e outras. 

Este Plan inclúe unha convocatoria pública á que se poderán presentar propostas de eventos vinculados á programación oficial do Xacobeo 27, co fin de ser avaliados e, no seu caso, patrocinados pola Xunta de Galicia.

Ademais, a Xunta de Galicia traballa para que o Ministerio active canto antes o programa de beneficios fiscais para as empresas e durante este ano 2026 lanzarase unha nova liña de axudas para incentivar a participación das empresas privadas e sociedade civil na programación desta cita.