Máis alá da ría de Muros e Noia, de xeito especial ao norte de Fisterra, esténdese un tramo de costa brava e variada. No medio de tramos rectilíneos, nos que se encadean amplos areais, como Carnota, Razo, O Rostro ou Baldaio, álzanse esgrevios acantilados, como os de Cabo Vilán ou o Roncudo, ou pequenas rías, como as de Corcubión, Camariñas ou Corme e Laxe. Na fronte costeira, moi preto da terra, aséntanse illas, como as Sisargas.
O apelativo de Costa da Morte vén do tráxico feito de que centos de barcos encallasen nos seus baixos pedregosos, quedando sepultados polas súas augas. Iso motivou que un río de lendas sobre naufraxios perduren na memoria colectiva.