Foi a primeira, floreceu cen anos antes, a cidade de Santiago de Compostela xorde da forza dun mito, un santo galego que conquista a Europa Medieval.

Monumental, cabeza do reino, a situación e o peso da historia fixeron dela a capital de Galicia.

Porto de Roma na ruta de Britania, rocha atlántica, case illa, A Coruña navega desde sempre co pulo económico do mar.

Cidade administrativa, de mercadores e emprendedores, xorde aquí o "Fast-fashion-system" que hoxe rexe o mercado mundial da moda.
 

Esperta da Idade Media no século XVIII, na vila mariñeira de Ferrol os ilustrados trazan novas rúas coa forza da razón.

O Arsenal Real fai abrollar unha cidade industrial na ría máis protexida.

Todos os camiños levan a Lugo, á fraga sagrada na que Augusto puxo a capital romana dos galaicos.

A muralla imperial aínda cinxe as rúas que centran a actividade dos seus orgullosos horizontes agrarios.

As ninfas gardan o santuario termal. A vía romana salva o Miño pola ponte de pedra.

Na encrucillada xorde a vida. Episcopal e burguesa no medievo, capital provincial no século XIX, Ourense é hoxe a cidade que marca a moda galega e a industria agroalimentaria.

A antiga ponte romana dalle o seu nome. De aquí parten as naves rumbo aos portos da Europa, na foz do Lérez, mareantes e mercadores constrúen a Pontevedra medieval.

Administrativa, comercial, a cidade soubo cultivar o prodixio e a pedra florece aínda á sombra das camelias.

Os peixes todos saben o seu nome. Nos sete mares do mundo pescan mariñeiros embarcados en Vigo, a capital europea da pesca.

A iniciativa industrial fixo desta aldea galaico-romana a metrópole industrial do sur do país.

Arriba
Axúdanos a mellorar!