A EuroVelo 3 “galega” comeza na localidade de Pedrafita do Cebreiro e logo sobe ata a aldea do Cebreiro, situada a 1.300 m de altitude entre as serras do Courel e dos Ancares. O Cebreiro é de orixe prerromana e é famoso polas súas típicas pallozas co teito de palla de centeo. Esta primeira etapa permite visitar outros lugares emblemáticos da ruta, como a localidade de Triacastela, o sorprendente mosteiro de Samos e a vila de Sarria. O percorrido tamén ofrece fermosas paisaxes de media montaña e numerosos exemplos de arquitectura popular galega.

A segunda etapa atravesa extensas zonas de prados e carballeiras en dirección ás ribeiras do río Miño, para despois cruzar a ponte que leva á vila de Portomarín, rescatada das augas tras a construción dun encoro e trasladada a esta nova localización. Palas de Rei é unha boa referencia para abastecerse antes de dirixirse á vila de Melide, onde remata esta sección. En Melide encóntrase o que posiblemente sexa o cruceiro máis antigo de Galicia. Tamén hai que probar o polbo á feira nalgunha das súas afamadas polbeiras.

A última etapa visita a localidade de Arzúa, unha das capitais do queixo de Galicia. A través da coñecida como “Ruta dos Holandeses”, pola estrada comarcal AC-240, visítanse os concellos de Touro e Boqueixón ata chegar á Cidade da Cultura, que nos dá a benvida a Santiago de Compostela. A capital de Galicia é unha cidade chea de atractivos de todo tipo, cun centro histórico tan ben conservado que lle valeu a declaración de Patrimonio da Humanidade.

Esta etapa iníciase na Praza do Obradoiro en Santiago de Compostela, meta de todos os caminos xacobeos. Cruza o río Tambre pola ponte máis significativa desta ruta, Ponte Maceira, ata alcanzar a vila de Negreira, de orixe medieval. O cicloturista comparte varios tramos co antiguo Camiño Real a Fisterra onde a comarca do Xallas regálanos a beleza das súas paisaxes e a súa xenuína arquitectura popular. Ao pasar o núcleo de Mollón chegamos a ponte de Olveira que cruza o río Xallas, que divide os municipios de Mazaricos e Dumbría. Alcanzamos o centro de Olveiroa, final de etapa.

  Distancia 55,45 Km

Esta última etapa parte de Olveiroa cruzando o río Hospital para dirixirse á aldea do mesmo nome, un lugar que contou cun modesto hospital para peregrinos, hoxe desaparecido.
O cicloturista alcanza o alto do Cruceiro da Armada para afrontar un marcado descenso con vistas á ría de Corcubión que finaliza na localidade de Cee, punto de unión coa EuroVelo 1, “Ruta da Costa Atlántica”, que ten a súa orixe, dentro de territorio galego na ponte Internacional do río Miño en Tui e percorre toda a costa atlántica da provincia de Pontevedra e do sur da provincia da Coruña.
A partir deste punto estas dúas rutas comparten un último tramo que atravesa unha comarca que ten un dos litorais de maior beleza da península ibérica.
Chegamos a Fisterra polo barrio de San Roque para seguir pola estrada de ascenso ao faro e finalizar no mítico “km.0” do Camiño de Santiago no cabo do fin do mundo.

  Distancia 35 Km