PARQUE NATURAL COMPLEXO DUNAR DE CORRUBEDO E LAGOAS DE CARREGAL E VIXÁN
Unha duna móbil única
Cunhas dimensións espectaculares, a duna móbil, que se atopa detrás da praia da Ladeira, é a gran protagonista deste lugar
O espazo protexido ocupa 1.000 hectáreas do municipio de Ribeira. Para protexela, está prohibido camiñar por ela.
Na túa visita poderás coñecer as rías de Arousa e a de Muros e Noia. Ademais da zona dunar, son de obrigada visita as praias da Ladeira e O Vilar, así como as lagoas de Vixán, de auga doce, e a de Carregal, de auga salgada.
Outros lugares que che recomendamos visitar son os miradoiros de Pedra da Rá e de Castro da Cidá e o dolmen megalítico de Axeitos. A 20 quilómetros ao norte do Parque podes visitar o Castro de Baroña, o mellor conservado de Galicia.
O porto de Ribeira é o porto máis importante de España en pesca de baixura e recomendámosche presenciar unha poxa, así como a descarga do peixe canda o retorno dos barcos. A vila de Corrubedo converteuse nos últimos tempos nun lugar ideal para descansar e pasar uns días preto da natureza e do mar.
O espazo protexido ocupa 1.000 hectáreas do municipio de Ribeira 
Está prohibido camiñar pola duna 
A posibilidade de explorar o parque ao alcance de todo o mundo
Camiñar polo Parque é a mellor forma para poder coñecelo. Existen varios itinerarios de baixa dificultade e completamente accesibles. Dende o Centro de recepción de visitantes podes optar polo Camiño da Praia ou o Camiño da Gandarela, que permite visitar a marisma da lagoa de Carregal.
Se queres visitar a lagoa de Vixán, dende o aparcadoiro da praia de Vilar arrinca o Camiño da Auga; este percorrido é parcialmente accesible para persoas con mobilidade reducida.
 |  |  |  | |
|---|---|---|---|---|
| Camiño do Vento | BAIXA | 1,5 Km | 30 min | LINEAL |
| Camiño do Río do Mar | BAIXA | 3,5 Km | 1,30 h | LINEAR |
| Camiño da Praia | BAIXA | 1,5 Km | 45 min | CIRCULAR |
| Camiño da Gandarela | BAIXA | 6 Km | 2 h | CIRCULAR |
| Camiño da Auga | BAIXA | 2,5 Km | 2 h | CIRCULAR |
Camiñar polo Parque é a mellor forma para poder coñecelo 
Existen varios itinerarios de baixa dificultade e completamente accesibles 
Un paraíso para avistar aves durante todo o ano
Corrubedo ten un enorme atractivo ornitolóxico que paga a pena descubrir. Trátase dunha importante zona de reprodución, migración e invernada de aves que se poden contemplar ao longo de todo o ano. O Parque abrangue hábitats costeiros como praias, rochedos litorais, marismas e dunas; ademais, tamén se poden avistar aves en zonas de interior como soutos, campos de cultivo, pozas e áreas de matogueira.
Na lagoa de Vixán hai un observatorio de aves onde te podes iniciar nesta actividade. A mellor época para observar as aves é entre setembro e abril. De tódalas maneiras, no inverno un gran número de aves acuáticas empregan as lagoas para descansar e alimentarse.
Parrulos, corvos mariños, píllaras douradas, garzas reais, cisnes... son algunhas das especies que máis destacan. Descarga a aplicación gratuíta de Birding Galicia e desfruta dos tres percorridos que propón: dous en coche e un terceiro apto para facer camiñando ou en bicicleta.
Observatorio de aves para poder iniciarse na observación de aves 
Corrubedo ten un enorme atractivo ornitolóxico que paga a pena descubrir 
Visita os miradoiros para contemplar a gran duna dende arriba
En Aguiño poderás visitar o miradoiro coñecido como Pedra da Rá; dende el contemplarás a mellor perspectiva da duna móbil, xunto á desembocadura da ría de Arousa e os municipios desta zona, como A Pobra do Caramiñal, Corrubedo e o seu famoso faro e mais a Illa de Sálvora.
Se seguimos o camiño de terra que está á dereita deste curioso miradoiro, poderemos chegar ao do Castro da Cidá, que alcanza os 210 metros sobre o nivel do mar e que presenta restos dun castro.
No municipio próximo da Pobra do Caramiñal sitúase outro espectacular miradoiro coñecido como A Curota, que se alza a 500 metros de altura. Tras aparcar o noso coche teremos que subir varios tramos de escaleiras de pedra. O esforzo recompénsase cunha panorámica espectacular do Parque, así como da ría de Muros e Noia e das illas de Arousa, Cíes e Sálvora.
Centro de Recepción de Visitantes Casa da Costa / Centro de Interpretación do Ecosistema Litoral de Galicia (CIELGA) Lugar do Vilar, Carreira
15960 Ribeira
T. 981 878 532
Descarga aquí o folleto en formato PDF
Vista ao Complexo dunar de Corrubedo e lagoas de Carregal e Vixán 
Faro de Corrubedo 
Praia dentro dos límites do parque natural 
As vistas ao parque son espectaculares 
Atravesar a gran duna a pé polo carreiro do Camiño do Vento é unha emoción que tes que sentir para entenderes o valor ambiental e o impresionante desta montaña de area.
Visitalas axudarache a entender o efecto do sistema dunar que illou a auga doce da lagoa de Vixán e uniu ao mar as augas salgadas da lagoa de Carregal.
No curuto do Monte Castro (Aguiño), toma o tempo necesario para contemplar a panorámica dende este miradoiro construído en granito e que ten forma de ra.
Camiña polos máis de 5 quilómetros de area que suman as praias da Ladeira e O Vilar. Goza dun baño nas augas do océano Atlántico.
