Turismo de Galicia

A dez quilómetros desta localidade, en dirección ao Cebreiro, polo denominado Camiño Francés, está a localidade de Triacastela onde podemos visitar a igrexa de Santiago. Construída en estilo románico sufriu unha profunda reforma no século XVIII. A 11 km de Triacastela encontramos o lugar de Fonfría e a igrexa parroquial de San Xoán, contruída no século XVI e con importantes reformas feitas en épocas posteriores.

Continuando o percorrido pola estrada LU-633 atopamos o alto do Poio, un lugar de gran beleza rodeado de bosques. Desde este miradoiro, situado a 1337 m de altitude, contémplanse a serra do Rañadoiro e o val que se forma aos seus pés. Tamén podemos ver o monumento ao peregrino no alto de San Roque, a 1270 m.

Se continuamos na mesma dirección chegaremos á aldea do Cebreiro, a 23 km de Triacastela. Un dos monumentos, de parada obrigada, é o santuario de Santa María A Real. Un templo fundado polo Conde Aurillac e construído no século IX, pero reformada posteriormente en varias ocasións.

Outra visita imprescindible é o Museo Etnográfico, emprazado en varias pallozas que conservan a súa estrutura orixinal. Esta poboación é moi coñecida por ser a porta de entrada do Camiño Francés en Galicia, polos seus monumentos e paisaxes, pero tamén polo seu queixo. Todos os anos celébrase en Pedrafita do Cebreiro unha feira de exaltación deste produto gastronómico. O Cebreiro será o punto final desta xornada, xa que conta con diversos aloxamentos e oferta de restauración.

Ao chegar a Seoane do Courel, a uns 18 km dende O Cebreiro, atopamos o indicador á esquerda de Visuña e Romeor. Seguimos a sinalización e a 4,8 km do cruzamento, deixaremos á dereita a estrada que vai a Visuña e Ferramulín. Se continuamos de fronte pasando por Millares, chegaremos á aldea de Romeor e ao túnel - acueduto romano.

A partir de aquí debemos continuar a pé por un percorrido de dificultade media. Hai que camiñar tres quilómetros polo curso dun regato de bastante caudal polo que é aconsellable ir provistos de botas e lanterna xa que uns 200 m do percorrido, ata chegar á outra ladeira da montaña, son case en penumbra. Volvemos cara a Millares, pasamos por Mostaz e desviámonos en dirección Visuña - Ferramulín. De camiño atopámonos coas ruínas do castelo do Carbedo tamén chamado de San Roque. Na zona pódese gozar da maxestosa e espectacular vista do muro do monte Cido, que nalgúns puntos pode alcanzar os 950 m para despois descender suavemente.

Dende Romeor, onde deixamos o coche, volveremos á estrada que nos trouxo dende Seoane, para continuar en dirección Visuña ata o alto do Couto. De aquí parte un camiño á dereita que nos levará a pé á Devesa da Rogueira. Neste punto do noso percorrido podemos contemplar o teito do Courel: o pico de Formigueiros. Continuando a ruta chegamos a Visuña, onde ata hai pouco seguían moendo dous dos muíños que hai na zona, e a Ferramulín (km 20,3 dende Seoane). Na primeira subida ao saír desta poboación, xusto nunha curva e mirando á dereita, vese a sinalización da baixada á fervenza de Vieiros Despois de percorrer 1200 metros chegamos á aldea de Vieiros e outro quilómetro máis aló á A Seara, unha das aldeas mellor conservadas do Courel.

Da Seara seguimos polo Soldón baixando cara a Quiroga e pasando polo miradoiro de Bustelo de Fisteus que nos ofrece boas vistas do val e a súa contorna.

En Quiroga poderemos deternos e visitar o seu Museo Etnográfico e o Museo Xeolóxico para coñecer máis sobre o Xeoparque Montañas do Courel.

A continuación dirixímonos pola LU-651 en dirección a Folgoso do Courel parando no miradoiro xeolóxico de Campodola que nos permitirá observar o Pregamento xeolóxico de Campodola-Leixazós.

No km 12 chegamos ao Alto do Boi, a 1061 m de altura. Neste punto hai unha pista cara á dereita, non apta para coches, que nos levará a Pía Paxaro e unha desviación á esquerda que nos achegará ao lugar de Vilar. Esta última, de 3,2 km, aínda que está asfaltada, considérase perigosa por ter unha inclinación do 16%. Está prohibida a baixada a vehículos con remolque ou autocares.

Unha vez en Vilar visitaremos o lugar, que conta cunha ducia de casas pegadas, algunhas delas con rúas moi estreitas e tellados de lousa. Cruzamos a aldea e seguimos o roteiro de sendeirismo de Froxán e Vilamor que nos levará a través dun souto de castiñeiros centenarios ata o castro de Vilar, nun meandro do río Lor, e á pequena ermida de San Roque. Acompañando o camiño vaise atopando un vía crucis, con cruces de madeira de 1 metro de altura. Tamén podemos visitar a Casa do Ferreiro cunha singular mostra de "Instrumentos e Aparellos". Desde Vilar a estrada continúa cara a Vilamor e Froxán. Paga a pena deterse na fervenza do Rexiu e visitar as dúas aldeas pola súa arquitectura tradicional, especialmente esta derradeira. Se aínda hai tempo, uns quilómetros máis adiante de Froxán atoparemos o miradoiro da Pena do Teso Grande. A outra opción para facer este percorrido sería retomar o camiño no alto do Boi, pola estrada LU-651, tomamos dirección a Folgoso do Courel pasando por Santa Eufemia e en Folgoso do Courel coller a desviación para visitar Froxán e Vilamor. Podemos rematar este segundo día ben en Folgoso do Courel ben en Seoane do Courel, xa que ambas localidades ofrecen distintas opcións de aloxamento.

Seguindo a ruta por unha estrada serpeante, a 14,2 km, encontramos o lugar da Casela. A seguinte parada será A Ferrería (do Incio), unha aldea construída enriba de penedos que tivo un importante pasado balneario. Lamentablemente, o edificio do balneario atópase en reforma Tamén se pode visitar o manancial mineromedicinal nas proximidades, subindo por unha pista á esquerda ao pouco de saír da poboación.

O itinerario continúa pola parroquia do Hospital e á igrexa de San Pedro Fiz, a único templo románico de España construído en mármore. Case dous quilómetros despois xa estamos na Cruz do Incio, capital do concello. Desde este punto debemos coller a estrada LU-641 cara a Samos e aos 8 km desviarnos cara a igrexa de Santa María de Mao, onde se celebra a romaría de Santo Eufrasio, bispo natural de Andújar, cuxos restos repousan no templo. Para a visita hai que preguntar polas chaves na cantina “Casa Campo”, onde se celebra a romaría de Santo Eufrasio, bispo natural de Andújar, cuxos restos repousan no templo. É característico o cemiterio cuberto que rodea o templo.

Para finalizar a ruta en Samos temos dúas opcións, unha indo polas aldeas de Vilamor, Cereixido e A Castiñeira ou ben desandar o camiño ata o cruce que deixamos antes e virar á dereita. Poucos quilómetros despois, como curiosidade, atoparemos ao pé de estrada dúas estatuas de mamuts. Se aínda hai tempo, xusto antes de entrar no concello de Samos, sae á dereita unha pista que nos leva ao castro de Formigueiros. A estrada LU-641 empata coa LU-633 de Sarria a Samos, punto final da ruta que comezamos hai 3 días.