A ría de Corme e Laxe é unha das pequenas rías centrais galegas. En plena Costa da Morte, a forza do mar marca a vida na terra, estando sempre presente o carácter mariñeiro de vilas e xentes.

Laxe e o seu faro son o punto inicial do percorrido. Situado no monte da Insua, na parte traseira da vila, o faro domina unha ampla perspectiva coa enseada de Laxe por un lado e a enseada Baleeira polo outro. Nesta última localízase a curiosa e delicada praia dos Cristais, na que a area foi substituída por desgastados vidros de enigmática procedencia.

Laxe conta cunha gran praia, un activo porto e diversas xoias arquitectónicas como a igrexa de Santa María da Atalaia (século XV) ou a Casa do Arco (século XV), famosa pola súa aparición na popular serie televisiva galega Mareas Vivas, cuxa acción transcorría nun imaxinario Portozás.

Saíndo en dirección a Ponteceso, pasamos a carón de diversas praias de mar batido até chegar ás Grelas, onde a enseada de Lodeiro ofrece as primeiras vistas do monte Branco.

O percorrido chega a Ponteceso, presidido pola ponte sobre o río Anllóns e a casa natal de Eduardo Pondal. O amplo esteiro do río configura un espazo natural de singular relevancia para a fauna mariña e as aves, conformado por dunas, lamazais e a foz do río. O itinerario transcorre en paralelo á xunqueira na procura do desvío cara o monte Branco, de amplas vistas.

De volta á estrada principal procuramos Corme Aldea, descritivo topónimo que diferencia este núcleo de Corme Porto e serve á vez para manifestar a dobre vocación, labrega e mariñeira, destas terras.

Corme é unha vila que mira ao mar. Afastada, en pleno litoral da Costa da Morte, máis alá só queda a punta do Roncudo… e a inmensidade do océano.

O porto é o epicentro da vila, abre o camiño cara ao faro, con continuas vistas sobre o mar. Lugar mítico da costa galega, a punta do Roncudo é famosa pola calidade e abundancia dos seus deliciosos percebes.

O faro do Roncudo é o punto final do percorrido. Construído no 1920, trátase dunha sinxela edificación asentada nos rochedos graníticos no medio dunha paisaxe modelada por ventos e auga que reflexa a fereza da Costa da Morte.