Edificio construído no século XIX (1847). A construción mostra a peculiaridade de formar un conxunto a partir de catro vivendas anexas, cun único tellado. Todas gardan similitudes, existindo pequenas diferenzas no tratamento decorativo. Na fachada, as catro presentan o mesmo esquema. Na planta baixa ábrense tres portas de acceso con zócolo. No primeiro piso sobresaen tres balcóns de ferro con varandas moi decoradas. No segundo piso destaca unha galería corrida, con pequenos elementos decorativos e dividida en sete tramos. O conxunto péchase cun tellado a catro augas e os materiais utilizados son os tradicionais: madeira e pedra, esta última vista e revocada.