Turismo de Galicia

"A capital de Galicia é a única cidade do mundo que ten unha marca astral. Á noite, un regueiro de estrelas sinala no ceo a mesma dirección, o Camiño de Santiago, a rota ao extremo confín do continente europeo.

Desde o século IX os peregrinos andan os camiños de Europa cara Galicia."

"Baixo a luz escura e misteriosa do Atlántico, no extremo occidental de Europa hai un verde país debruzado diante do Mar Maior.

Situada ao sur do Mar Céltico, ao norte do espazo mediterráneo, Galicia forxou unha cultura na encrucillada destes dous mundos. Velaquí un antigo reino atlántico onde vivimos preto de tres millóns de galegos."

"Contra este mar bravo, contra o Océano Atlántico, os galegos sentimos toda Europa ás nosas costas.

O océano acouga nas rías. Nestas singulares formacións xeográficas o mar penetra terra dentro e a vida xorde."

"Illas que agochan un sorprendente bosque de loureiros, carballeiras que flotan sobre o río Miño, bidueirais nos que se refuxiaba o home lobo, aciñeirais que foxen das devesas mediterráneas e se cobren de mofos atlánticos, os faiais máis occidentais da cornixa cantábrica, o bosque de teixos máis grande de Europa..."

"Velaquí unha paisaxe que os galegos gustamos de dicir humanizada —unha casa aquí, outra acolá— onde a distancia entre os lugares non é moita e onde os lugares inhabitados son sempre de pouca extensión."

"Hai 6.000 anos, as primeiras comunidades de agricultores comezaron a erguer os dolmens. Do mar á montaña, no noso país cóntanse por miles, pero só algúns mostran ao ar as súas grandes pedras"

A Galicia urbana é esencialmente atlántica, xa que cinco das sete cidades galegas atópanse no eixe que se estende coma un continuo, dende Ferrol ata a fronteira portuguesa e que asentan ademais: A Coruña, Santiago de Compostela, Pontevedra e Vigo.

"O románico acada o seu cume no Pórtico da Gloria.

Aquí, a arte europea aprende a sorrir de novo, despois de tres séculos de telo esquecido."

"Hoxe, a presenza de Galicia no mundo é tamén económica: aquí ten a súa sede a maior cadea internacional de moda, o turismo acada o 11% do PIB e o noso país é a primeira potencia pesqueira de Europa."