SANTUARIO DOS MILAGROS

Relixioso
495

Localización

Parroquia: Caión (Santa María do Socorro)

Lugar: O Outeiro

15105  A Laracha - A Coruña

Coordenadas:
43º 18' 38.9" N - 8º 36' 20.0" W

Descrición

Onde agora se alza o Santuario dos Milagres debeu existir unha primitiva igrexa románica, templo parroquial de Caión. O templo actual é unha construción do século XIX, de estilo barroco compostelán. En 1801 comezaron as obras baixo a dirección do mestre canteiro Juan Antonio Castro, que se prolongaron durante trinta e catro anos.
É un templo de planta rectangular dunha soa nave e cuberta a dúas augas. Na fachada, que data de 1836, concéntrase a maior creatividade e ornamentación. Consta dunha porta alintelada, con xambas e lintel moldurado. A decoración central tamén é moldurada e carece de imaxe. Dúas grandes pilastras acanaladas reciben unha cornixa moldurada e enmarcan todo o sistema de portada. Por riba sitúase unha torre campanario composta de dous corpos: o primeiro, cadrado, e o segundo, octogonal con decoración xeométrica a base de círculos.

En 1835 o mestre canteiro Manuel María Neto realizou a torre da igrexa, de estilo neoclásico. Nos dous anos seguintes colocáronse as campás, feitas en Santiago por Dámaso Dopazo. Catro anos máis tarde constrúese a sancristía e con ela finalízase a estrutura do santuario. 

Á saída do santuario, á man dereita, atópase unha fonte construída no ano 1828. Posúe unha auga pura e cristalina que, segundo as crenzas populares, é milagrosa.
Como unicamente se celebran cultos neste templo durante a semana de celebración da Romaría dos Milagres, a imaxe da Virxe permanece na igrexa da nosa Señora do Socorro.

Acceso

En autobús: desde a estación de autobuses da Coruña (Empresa Autos Vázquez) hai cinco servizos diarios de luns a venres, dous os sábados e tres os domingos e festivos.
En coche: collendo a AC552 (A Coruña - Cee), seguindo estas alternativas dirección Caión:
1ª Desvío en núcleo urbano de Arteixo pola DP0514.
2ª Desvío en núcleo de Paiosaco pola DP0513. Se se usa a AG55 tomar a saída de Paiosaco.
3ª Desvío xunto á praza do Concello da Laracha pola DP1913 e DP1909.
4ª Na rotonda de acceso AG55 polo parque empresarial tomando a DP1913 e DP1909.

Accesibilidade

En autobús e/ou en coche.

Lembra que pode haber recursos que non estean xeorreferenciados e, polo tanto, non os esteas visualizando.
Última actualización: 18/07/2017
Arriba