Conta a lenda que baixo as augas da Lagoa de Cospeito hai un pobo chamado Valcárcel que foi inundado por mandato divino. Uns din que aínda se escoita o tanxer das campás da igrexa, outros aseguran ter visto os tellados das casas cando baixa o nivel do pantano.

Sexa como sexa, as protagonistas deste sendeiro son as lagoas que ocupan este territorio chan declarado Reserva da Biosfera Terras do Miño. A primeira que atopamos é a Lagoa de Cospeito na que o itinerario intérnase para contemplar a asombrosa vida que nela existe. Despois, na metade do percorrido, a Lagoa de Carballosa.

É un sendeiro lineal, preto do inicio rodearemos a lagoa por un camiño creado para a observación ornitolóxica, camiñando sixilosamente, dende as torres de observación, poderemos ver e escoitar centos de aves acuáticas que utilizan a lagoa como refuxio.

Logo a senda penetra no bosque seguindo as antigas vereas que rodean a Feira do Monte. Tras cruzar a carreteira internarémonos na auténtica Terra Chá onde as longas rectas, horizontes distantes e chans darannos a sensación de atoparnos nunha “Galicia distinta”.

Intercalando paisaxes agrícolas e forestais, pasaremos pola Lagoa de Carballosa e ata o final avanzaremos  facilmente por un terreo sen desniveis. Remata na igrexa de San Martiño de Lamas, alí poderemos ver un cruceiro con motivos da paixón labrados no fuste.