Miradoiro natural, A Moá é un deses lugares dende os que interpretar o territorio nun sentido amplo. Cos seus 1123 metros de altitude constitúe un magnífico punto dende o que apreciar o val de Quiroga e Ribas de Sil, amplo e profundo á vez, tendo de fondo, nunha fantástica vista panorámica, as diversas serras que configuran O Courel.

A Moá establece o límite entre as provincias de Ourense e Lugo. Dende o punto de vista orográfico ofrece continuidade na paisaxe, pasando dunha chaira con monte baixo a unha vertente que cae cara ao río Sil cun forte desnivel.