Situada na zona de Parada, na mesma estrada que nos leva a Bueu pola zona de Portela. Realizada no ano 1708 cun marcado estilo barroco, dunha soa nave rectangular. É de modestas dimensións orientada ó Leste, de planta rectangular e sen presbiterio diferenciado. A nave cóbrese con un teito de madeira, pero o altar maior, ó que se accede por un gran arco triunfal semicircular, está cuberta por bóveda de canón. Conta cunha modesta entrada principal baixo arco semicircular, e unha porta lateral no muro setentrional, así como varios vanos para iluminación interior. Na fachada sobre a porta vemos, ademais dunha sinxela espadana, o relevo dun gran escudo de armas dividido en dous cuarteis, cos brasóns dos vínculos familiares do promotor, neste caso, os Ramírez Montejano, construída pola súa advocación a San Cosme.
A festa destes dous santos celebrase o 26 de setembro e son os patróns dos médicos e boticarios respectivamente, sendo representado San Cosme cunha vaixela de vidro e Damián cun  instrumental de botica dentro dunha caixa.