Edificio situado no casco histórico da vila de Betanzos, de estilo neoclásico, construído no século XVIII (1764). Presenta unha planta rectangular onde se desenvolven dúas alturas. A fachada principal é de cantería. A composición do edificio articúlase con base, corpo principal e cornixa. O acceso á primeira planta faise a través dunha escalinata dobre con patín, que dá á porta de entrada, sobre a que se abre un óculo oval, que rompe o ritmo dos restantes elementos encadrados; sobre el, aparecen as armas de Galicia. O edificio non chegou a ser utilizado para os fins cos que se proxectou, pois foi cuartel, escola, teatro e sede de sociedade, nunca arquivo.