Igrexa de estilo barroco da primeira metade do XVII. Planta de cruz latina, á que se lle engadiron dous corpos rectangulares. Aos pés da nave atópase o coro alto. O interior da nave principal está cuberta por unha bóveda de canón sostida por arcos. Destaca o retablo do altar maior, de madeira e policromado de dourado. No exterior os panos dos muros de cachotería contrastan cos contornos de vans, os esquinais e a fachada principal, onde quedan á vista magníficos perpiaños. Na fachada principal destacan o arco de medio punto sobre a porta de entrada e a cornixa rematada por pináculos. A torre do campanario culmina nunha cúpula semiesférica. Cuberta a diferentes augas de tella curva.