A primitiva igrexa de San Pedro de Burgueira debeu ser de estilo románico, aínda que diferentes reformas posteriores acabaron con vestixio algún daquela época. O templo actual data de 1808, data gravada nunha lenda da torre, e a súa pedra foi traída dende as canteiras de Bonaval, onde houbo que facer unha ponte nova para permitir o paso dos carros cargados. Consta de alta Torre de bo gusto barroco e ten unha soa nave e dúas capelas laterais. Cóbrese a nivel interior con bóveda de canón apoiada sobre arcos faixóns.